日記佬大聯盟

 近日我終於睇左電影＜Phantom of the Opera＞啦！我細細個就聽過呢個名，都有興趣嫁，不過我係咁嫁啦，講多過做，依家後悔太遲啦！

後悔既主因係：電影甫開場——巴黎歌劇院。原來原著係法國人、背景係巴黎；而我早兩年歐遊用我緊絀既盤川入巴黎歌劇院睇左場歌劇！！！如果我坐言起行早啲認識呢個故事，我去巴黎歌劇院時就可能會睇得更多、更細，成個遊歷體驗都會更深刻！

就因為咁，我搵返我啲歐遊相同日記出黎，發現都幾多趣聞記低左，其實都幾值得分享，唔係又忘得一乾二淨。咁就岩曬呢排想畫EG但苦無題材既日子啦！

重啟歐遊小趣事既計劃就遲啲慢慢實行，今日就略講下呢齣戲同巴黎劇院之遊先。

電影版個劇本就一般貨色啦，睇影評講簡化左好多細節，小說似乎精彩好多，有機會都想睇（跟住又拖）。故事無咩思考空間，中間我不停諗係咪象徵緊女主角既光明與陰暗面呀、現實與夢想呀，後來發現好似都諗多左，只係一個愛情故事。

但齣戲最令我入迷既係畫面拍得好～靚！記得第一幕係黑白既，我心諗套野有冇咁舊呀？原來倒敍——龐然吊燈扯高、布幕拉開、激昂音樂一起，畫面慢慢上色，金碧輝煌既歌劇院重現眼前戈下真係冷震都打埋。一來係因為電影風格好夢幻詩意啦，二黎係巴黎歌劇院真係鬼火咁靚。套戲個景好似係假既，但其實巴黎歌劇院真身既奢華亮麗係不輸電影場景！

可惜去法國既相電話錯誤離奇失蹤，得返兩三張鬆郁濛既，我都係要照Post威下！

一入兩層高大廳富麗堂皇，大樓梯兩邊雕塑氣派非凡，即刻呼吸都停兩拍！

入到劇院帷幔垂垂、牆身雕刻精緻講究、圓拱天花壁畫溫柔壯麗，完全自覺渺小如塵。

我仲記得中場休息有間偏廳好多人拎住野食野飲hea，即刻到幻想以前貴族係度開P衣香鬢影呀。（我就梗係著到成個乞衣咁啦）

睇戲時內心好激動，如果我睇左戲先去歌劇院，望住呢一個個角落，咪會有好多想像同畫面囉！！！喂呀嘥曬啦！

不過我知呢個只係一個機會，比我第日再重遊巴黎！！！下次我要講住法文去Opéra de Paris睇＜Phantom of the Opera＞！